Šandēinan teikāntjai nawwan, lāukan be preslewingin izarwiskan Prūsa etskīja kāigi būwus be sēnti kultūriskan be nōseilewingiskan fenōmenan.

Prūsiska kultūri ast swarewīngis stēisan Leītawas, Lattawas, Kunnegsgarbas tāutas, Belarussis be Pōlis kultūrin delīks. Pirmāi waistāi baltiskai papeisatāi tekstai be izdrukautāi laiskāi ast prūsiskai. Be pa delli kawīdans pakarriskans wīdikausnans prūsiska bilā mazēi izlāiktwei īr ērgi XX mts. Adder sklāit per prūsiskan prasīsenjan pastānja mazzan interessitan si en wālstis līgmeni, etniskan kultūrin brewīnantjas ōrganizacijas dīgi ni wartinna nōdan prēi din.

Ezze XX mts. septmas mettadesimtas wangai pagaūwa si prūsiskas billas etgīmsenis. Kadāi bēi di preigirbautā prēi stēisan iznīkusin billan kategōrijan, adder ezze 2007 m. ēn SIL International stēisan billan kōdan dātanbazei prūsiskas billas stātus pastāi kitawīdints .“gīwan”. Sta bēi stēisan zinānikan be stēnsenikan drāugan dēlan, ezze kwēimans ainuntkawīdai makinnusis prūsiskan swajjans malnīkans.

Ēn panzdaumans metadesimtans pastāi kurtas tūlan prūsiskas kultūriskas teikālis, prēi perwaidīnsnan, Gēidrjas Kuprewičas ōperi Prūsai (1995 m.), dāinewiskas folklōris gruppis Kūlgrinda stēisan prūsiskan grēman albuman Prūsų Giesmės (2005 m.), prūsiskas muzīkis gruppis Romowe Rikoito prūsiskans albumans Undēina (2014 m.) be Nawamār (2016 m.), mistērijan Gajā (2022 m.), grēma Jātawjai, be Māntas Maziljāuskas mōderna wizuāla teikā, endausintā pra prūsiskan temātikin.

Ēn 2002 m. ōficialai registritā Leītawas Prūsiska Perā stengja si naikīntun deznans presnans, kāi baltiska prūsiska kultūri asti.“iznīkusi”. Tenā ast etwirā wisēimans, kasmu ast taūwa prūsiska weldisnā be brewinna stēisan prūsiskas kultūris fōrmin enlaukīsnan, erlaikāsnan be tālaisjan etwijāsnan.

Swarewīngjai nūses dēlasnas aspektai ast prūsiskas billas makīnsna, stēisan makīnsnas appun teikasnā (nusāi streīpstai kūri elektrōniskan wirdeīnan be awīzin, kawīdai jāu 16 mettans ast ēn tinklasalōnu twanksta.org) be kunstenikiskas prūsiskas kosmolōgijas enlaukīsnas. Sirzdau nūsans tēntiskans prōjektans be planans: giwāi billas pratīnsenjai, stēisan tālaisin prūsiskas billas makīnsnas resūrsin ēn internettu teikasnā, wirdeīnas be dwaibilliskan prūsiskan lāiskan (folklōras, dīgi tēntiskas literatūris) perlazīnsna, kultūriskan erswāikstinsna, teikāwingjai liskai, tēntiskas kunstas prōjektai.

Leītawas Prūsiska Perā pastāi kurtā na krāujas be naseīlis gruntan, eīskjai izprestāntjai be waīdantjai, kāi spārts tūlan prūsai, izrankīwusis si ezze genōcidiskamans skrīzjas karrjagamans, ezze māru, miksinsnai, mackālinsnai, pergūbi prēi swajjans baltiskans brātrins ēn Leītawan, Lattawan, Krēiwan. Stan wīdikaui istōriskai appus, dīgi prūsiskai topōnimai ēn stēimans deiktammans.

Mes wartinnimai si prēi wissans pawīrpas kwāitas zmānentins be perwākawimai īmtun delīkan ēn etteikāsnas dēlans. Teinū nūmans ast spārtai prawerīngi finānciska, fizīska be nōseilewingiska pagalba. Ik Jūs kwaitēitei īmtun delīkan ēn din, perwākawimai sēn mans kōntaktitwei.